كلمتك لن تموت
بقلم..مرقص اقلاديوس
................
يا ترى الكاتب بيكتب الكلمة.
و لا الكلمة إللى بتكتبه.
تصدقوا
أوقات الكلمة إللى بيكتبها.
بيكون ربنا يقصد بيها يعلمه.
يعلمه هوا نفسه
قبل ما يعلم اللى بيقراله.
و تلاقى الكاتب بيكتب كلمته.
و هوا و لا على باله.
الكلمة غالية ،،قيمتها عالية.
الكلمة ممكن تملا الدنيا
فرحة و مسرة.
تخليها مبهجة زاهية.
مش عارف ليه الناس
دايما بينسوا.إن الحياة ثانية.
و الحياة ما بتتكررش
الحياة مرة.
لكن يا خسارة ..الناس
بيخلوا الحياة بكلمتهم مرة.
عشان كدة الشاطر
يخلى كلمته شحنة نور.
تنور عتمة السكة.
و يخلى كلمته شحنة أمل
ل..بكرا
إللى جاى يجرى على السكة.
عشان لما هيقول كلمته و يمشى.
نورها هيستمر
ينور الدنيا الغالية.
عشان حلاوتها
تكسب مرارة الدنيا الفانية.
عشان دايما
و كل يوم
هنحلم ب ..بكرا.
و هنفضل عندنا أمل فيه بيها.
لغاية ما نقابل
إللى بكلمة إبتدى الدنيا.
و بكلمته برضو هينهيها.
مهما حصل..مهما حصل
قول كلمة حق
و لو حاول أى واحد يخفيها.
هييجى يوم تظهر
و ينسبوك الناس ليها.
ملاح بحور الحكمة
مرقص اقلاديوس
ليست هناك تعليقات:
إرسال تعليق