طب ايه بقي؟ شعر/جيهان النجار
هنقضي طول الليل سوا باصين لبعض بدون كلام
لغة العيون فيها معاني مبهمة
طب هات كده النظرة اللي فاتت من جديد
مش دي.... اللي فيها دموع بتكوي ومؤلمة
ينفع كده؟
إزاي اطيق انا كل دا
قلبي حجر؟
طيب خلاص
حقك علي عيوني الغجر
الظلمة حتي ف حلمهم
ملعون ابوهم وامهم
آسفة حبيبي وحق من خلاك قمر
وعنيك ربيع
ورماك ف قلبي نمنمة طرحت شجر
وسقاك حياة
ورعاك حقيقة ف مهدها صبحت صلاة
لأعاقب الشك بوفا
آسفة حبيبي خلاص بقي
حقك علي قلبي الغبي
وحياة عيونك بص لي
طب والنبي
ياشيخ بقي
ياعم بنهزر سوا
اضحك بقي وبلاش غبا
ليست هناك تعليقات:
إرسال تعليق