*** قال بكره عيد ***
**************
ما تقولش بكـره يبقى عيد
دا مستحيـل دا شيئ بعيـــد
ان بكره يبقى عيد
***
انت عارف امته بكره يبقى عيد
لمَّا يبقى الدم يثبت فى الوريد
لما يبقى حلمنا سهـل واكــيد
يبقى جايز بكره عيد
***
يبقى بكره عيد أكيد
لما تلقى الضلمه ما بيخشاها نور
لما تلقى الظلم غرقان فى البحور
لما يطلع الكافور من غير جذور
يبقى بكره عيد ونور
***
بكره جايز يبقى عيد
لما يبقى الديك يبيض
لما طفل يتولد فى دم حيض
لما تخرج الابتسامه م الحضيض
***
بكره جايز يبقى عيد
لما يبقى عزمنا زى الحديد
لما تبقى الميه زى النار تقيد
لما يبقى جرجس المقتول شهيد
لما تبقى النار جليد
يبقى بكره عيد أكيد
***
بكره جايز ::: احتمال
لما يطلع الطفل الجبال
لما ينشف المحيط والقنال
لما تخرج راسنا من تحت النعال
ساعتها بكره يبقى عيد
من غير محال
******
شاعر القريه
فيصل بدر
ليست هناك تعليقات:
إرسال تعليق